ACUNGU ka wang Uganda acon i United Nations dang dok aran atidi acon bot United Nations, Olara Otunnu ame otuno i Uganda iceng abicel okwero acil ni en pe ebedo ingec me turo loc Obote me aryo.
Ikare ame tye alok kede oco amut i Botanical Beach Hotel Entebbe inge poto idege me Kenya Airways cawa 9: 45 me odiko, Olara obin okwero acil ni en pe ebedo igoyo pulan, kede keto itic yuba me turo gamente Obote me aryo.
Omony me UNLA ame Gen. Tito Okello kede Gen. Basilio Olara Okello otelo wi gi obin oturo gamente Obote me aryo I 1985 kan ame ote keto Olara Otuno me bedo Minister me kop ipaco.
Ento ilokere kede oco amut, Olara okobo ni en cakere ame Obote dwog iloc onwongo pe ebedo I Uganda ento onwongo ebedo i UN calo awing Uganda.
En otito ni ame turo loc pwod pe otimere, ebedo winyo iradio kede kwano ipapula ni tubere obedo ikin mony ento ikare ame epenyo, ote game ni obedo ginoro atitidi ame pe myero epar.
“Abedo kede wur me winyo icenere ni gamente otur,” en okobo. Olara omede ni ikare ame Tito gi olwonge Kampala, en ego cim bot Obote kan ame adit man te tite ni etwero wot ento piny pe tye aber.
“Gwokere ento ite miya ngeyo” Olara okobo ni Obote ocike. En otito ni omie eye me bedo minista pien onwongo emito kop me poro lok wek kel kuc kede note I Uganda. En okobo ni jo apol omie tam naka preciden Museveni.
“Abin aye ento kede gung cuny kun ajalo kwo na me cako poro lok wek gik kop me onyo remo,” Olara omede. Adit man otito ni pi kare ame ebedo I gamente ducu, ebedo ikop me poro lok ame dang te cek ento Museveni onwongo tye kede tamere te tic kede gero me gamo gamente.
Olara otito ni ikare ame ebedo minista, elimo Dr. Obote Zambia tyen apol ame dang enwongo Jimmy Akena kede totere Miria.
“Ento pi kop me wibye, tye jo okene ame ngeo kop ateni ento pwod omede kobo goba ni an dang abedo iyika me turo gamente Obote,” Olara okobo ayie pe yom.
Polici pe obin oye ni jo apol lwok Dr. Olara. Ikare ame otuno te neon ocwake ame opong, Olara obedo ka kobo ni thank you, thank you (Apwoyo, apwoyo). Ilokere kede ococ, Olara okobo ni acalo oloc okene, Obote obedo kede goro mere.
“Wan pe myero oter ni jami ducu ame Obote otimo obedo bal kit ame Museveni mio jo niang kede. Ka okobo kop ikom Obote nyo atela moro keken, myero obed jo ame neon ryoryo.
Myero onyut goro gi kede gin ame gin otimo aber dang.” Amako tubere ikin Buganda kede gamente me UPC, Olara okobo ni man tim me rem cuny ame myero mo diro me cobo icuny acil kede gen.
“Buganda pire tek pi Uganda, UPC dang pire tek pi Uganda telo tol ikin gi myero pe mede,” Olara ocao atek tim me cimo jo acon me dok idul me Electoral Commission.
En okobo ni pati ducu ame tye myero bed kede dwon ikop me cimo otela me EC. Olara otito ni ni tic karacel en aye twero kelo kuc kede dongo lobo.
No comments:
Post a Comment
Thank you for joining in the conversation.
Patrick Ogwang